ماشى فى الشارع خابط البنطلون ووسطه واقع وخابط التيشرت اللى مكتوب عليه بكل معانى الرجوله (kiss me ) وماشى مسرح الشعرتين بالجل ابو الكيلو بجنيه وقرب قرب قرب الكيلو بجنيه وجايبه شويه يمين وشويه شمال وعلى رأى عدويه( حبه فوق وحبه تحت) ومقولكش ع الحزام احلى كلام فى الهوى قولناه مكتوب عليه اتيتاس مش اديداس الليله كلها تقليد ورافع التيشرت عليه والشوز المحترم اللى من نفس ماركة الحزام قال ايه بقى لزوم الوجاهه والشياكه ولا يالهوى ع النضاره حته ريبان تقليد من ام سبعه جنيه ومعايا نضارات نضارات اى نضاره بسبعه جنيه نضاره يا بيه نضاره للبيه يا مدام نضاره لاحمد نضاره لسعاد وطبعا مننساش فضل الحلاق بتاعه قصدى الكوافير عشان منبقاش ناس بيئه فى تظبيط الحاجبين والفتله طبعا صاحبة الفضل الكبير وماشى فى الشارع يا ارض اتهدى ما عليكى قدى والله يرحمك يا سعاد يا حسنى وانتى بتقولى يا واد تقيل ( تقيل تقيل ) ماشى وحاسس الدنيا كلها بتبص عليه ليه ؟ عشان مفيش غيره بيه والبيه لازم يكون وجيه وادينى فى الهايف وانا احببك يا فننس .. تقابله البنت فى الشارع يغمزها عين وتلاقى البنت حسره عليها يا حسره عليها مجت رجليها مجت رجليها وقعت واغمى عليها وحركاااااااااااااااااااااااات والبيه طبعا ماشى البنت تقع يمين والبنت تقع شمال واتاريه عايش فى الاحلام ويقابله فلان وعلان ياعم هات اللى عليك يقوله منين يا حسره وانا ماشى خربان وياعينى ع اللى بيحصل واحد ياخد الحزام وواحد ياخد الشراب وفى الاخر يمشى عريان وكأنك يا ابو زيد ما غزيت واللى خدته القرعه تاخده ام الشعور
سؤال الحلقه مين الشاب المفسفس؟ 1-اللى خدته القرعه 2-اللى طلق ام الشعور 3-ابو زيد ولو عرفت الاجابه كلمنا على الخط الساخن هو مش ساخن قوى بس كلمنا وربنا يعوض عليك فى تمن المكالمه